Bon, vonde: mandiii
A ‘nd ai une sglonfe… O sieri, si viodìn plui vecjos
Bon bon, aromai al jere clâr a ducj che mi soi stufât. Par plui motîfs. Mai stât miôr come te pause estive cence blog, masse impegnos e masse "logorio da la vite di blogarin" ;-).

Podopo zontìn che o soi deventât diretôr di «Patrie dal Friûl» e il blog nol jere cussì libar come prin, no tant pal gno ategjament, che o sai separâ lis dos robis.

O ai spietât un pôc che il mecanic al comedàs lis robis par provâ a fâ un gnûf progjet, ma la facende a va un tic a rilent. No rivant a moderâ e a "postâ" cun continuitât, miôr un stop e si viodarà ce che si rive a cumbinâ plui in là. Us invidi intant a lâ simpri di plui su Macôr.

Un grues mandi ai letôrs che jo o definìs "normâi", che il blog al è massût par lôr: chei che magari no comentin par la ataviche pore di "no savê scrivi". Chei che chest blog al à contribuît a fâi scuvierzi tantis robis sul furlan che no savevin e che cheste lenghe e pues jessi trancuilamentri doprade te modernitât.
Anzit: lis ideis furlanistis a si dimostrin puntualmentri ches plui indevant rispiet a la mentalitât provincialote dai sorestans locâi, no nome politics.

Un mandi ancje a chei rompibalis di furlaniscj 😉 e ai sticeboris variis 😛

Advertisements