»»» ILfurlanist 482
Master par insegnants di furlan
Inmò cualchi zornade par iscrivisi
Ai 3 di Avrîl aes 11.00, te aule 12 – prin plan – di Palaç Antonini a Udin si davuelzarà l’incuintri public di presentazion dal Master universitari di II nivel/Cors di inzornament “Insegnâ in lenghe furlane” promovût de Universitât dal Friûl cul sostegn de Agjenzie Regjonâl pe Lenghe Furlane.

Il Master/Cors di inzornament, ativât pal an academic 2007/2008, de durade di 21 mês pal valôr di 60 credits formatîfs universitariis, al scomençarà ae fin di Avrîl 2008 e si sierarà tal Dicembar 2009 disvilupantsi in dôi ciclis di lezions frontâls e di laboratoris.

Al Master/Cors di inzornament a puedin notâsi ducj chei che a àn un titul di lauree magjistrâl o une lauree di vecjo ordenament o un diplome di scuele secondarie e che tal moment de presentazion des domandis a dimostrin di jessi o di jessi stâts formalmentri in servizi in struturis educativis. Cun di plui al covente vê une cognossince almancul orâl de lenghe furlane.

Lis domandis a varan di rivâ dentri dai 7 di Avrîl ae Ripartizion Didatiche, Sezion Servizis ai Students e ai Laureâts, in vie Mantica 3 a Udin.

Il Master/Cors di inzornament al intint furnî ai insegnants/educadôrs che a lavorin te scuele de infanzie, primarie e secondarie une schirie di cognossincis culturâls, sientifichis, linguistichis, didatichis e di competencis operativis di fonde, par doprâ la lenghe furlane in forme veicolâr tal davuelziment des ativitâts e des dissiplinis previodudis dai curricula scolastics e par disvilupâ une salde competence plurilengâl e pluriculturâl tai arlêfs.

Il profîl professionâl che si larà a definî al è chel di un docent in stât di planificâ e di davuelzi l’insegnament de lenghe furlane integrant il svilup de competence linguistiche cu la maturazion di cognossincis dissiplinârs, di capacitâts operativis e di une efetive competence plurilengâl e pluriculturâl.

Par altris informazions i interessâts a puedin contatâ la Ripartizion Didatiche dal Ateneu o consultâ il Manifest dai Studiis ae direzion: fracait achì

Advertisements