Cunvigne su lenghis minoritariis, media e emigrazion ai 14 di Març a Colonia Caroya


L’apontament cun esperts e rapresentants di ents furlans e argjentins si podarà viodi e scoltâ su la rêt



La emigrazion e fâs part de storie di tantis comunitâts di lenghe minoritarie in Europe.
Tra i emigrâts furlans l’ûs de lenghe native si è svilupât in maniere divierse a seconde des tieris là che a son rivâts, ma cun cierts elements in comun: il leam fuart des primis gjenerazions, la crevadure des secondis e, dispès, il recupar di interès des tiercis.
A vierzi gnovis prospetivis tal rapuart cu la tiere, la lenghe e la culture di origjine a son rivadis, tai ultins dîs agns, lis gnovis tecnologjiis e formis di comunicazion, che a permetin di interagjî cun ducj, dapardut.

«Un prin cambiament – al sclarìs Luca Peresson, espert di gnovis tecnologjiis e president dal Centri Friûl Lenghe 2000 – al è leât aes pussibilitâts dai gnûfs imprescj: chê di jessi informâts su chel che al sucêt te tiere di origjine (mert di television satelitâr, web, radio on line…), di colaborâ a distance a progjets comuns, di fâ rêt. Parie, i gnûfs mieçs a permetin di inlaçâ contats cu lis secondis e tiercis gjenerazions de emigrazion regjonâl, judant a ripuartâ la lôr atenzion viers la culture e la storie di provenience. No ultin – al zonte –, al è di considerâ ancje cemût che al podarès mudâ il rûl des associazions dai emigrants, se chestis a savaran doprâ lis oportunitâts dai gnûfs mieçs di rivâ in dut il mont».

Su cemût che la difusion dai gnûfs mieçs di comunicazion e ufrìs imprescj origjinâi par valorizâ i leams di culture e di lenghe tra regjons di divignince e comunitâts emigradis a pro di une condivision des esperiencis si è fevelât za tal 2007 a Colorêt di Montalban inte cunvigne su «Lenghis minoritariis, media, emigrazion», inmaneade de Comunitât Culinâr dal Friûl e de Cooperative Informazion Furlane, une vore sensibilis ai temis de emigrazion e de promozion de marilenghe. Cumò la riflession e va indevant. Sul stes cantin si resonarà, di fat, vinars ai 14 di Març a Colonia Caroya – citât argjentine fondade tal 1878 di un grup di fameis furlanis – dilunc de cunvigne inmaneade de Comunitât Culinâr dal Friûl cul contribût de Regjon Friûl Vignesie Julie e la colaborazion organizative de cooperative Informazion Furlane, e che si podarà viodi e scoltâ su la rêt, propri in gracie dai gnûfs imprescj comunicatîfs.

Si vûl puartâ la riflession su la necessitât di une comunicazion ative «viers» e «da» la emigrazion. Isal pussibil progjetâ un «Friûl mondiâl», un «Friûl in rêt», dulà che lis diviersis comunitâts a interagjissin intune rêt di relazions? Cuâi sono i struments e lis strategjiis di comunicazion e cuâi sono i servizis che a àn di sedi realizâts par rivâ a chest obietîf? E ancjemòa, cemût cambie, seont cheste prospetive, il rûl des associazions storichis dai emigrants? A chestis domandis e cirarà di rispuindi la cunvigne dai 14 di Març. Ducj a podaran seguîle in videoconference su http://www.friul.tv e in direte radiofoniche su Radio Onde furlane (90.00/90.20 Fm Friûl, 96.60 Fm Argjentine, http://www.friul.it streaming). Pe ocasion al sarà viert ancje un forum di discussion in rêt ae direzion: http://lenghisminoritarismediaemigrazion.wordpress.com

A rivuart dal program, part dai intervents a vignaran fats vie skype. I lavôrs a scomençaran a une dopomisdì, ore taliane, cul salût des autoritâts: Rodolfo Visintin, sindic di Colonia Caroya; Lorenzo Cozianin, president de Comunitât Culinâr dal Friûl; Santiago Lauret, di Bodega La Caroyense S.A. Dilunc de session de matine, davierte de relazion di Nicolás Viel e Luis Grión sui cent e trente agns de fondazion di Colonia Caroya, a fevelaran Sergio Boezio, president dal Centri furlan Colonia Caroya, e Silvia Visintin, vice presidente de Alef di Colonia Caroya. Po dopo a disaran la lôr Paolo Menis e Claudio Violino, conseîrs regjonâi dal Friûl Vignesie Julie, Robert Pontisso dal Canadà, Giorgio Cadorini de Cechie, Luche Melchior de Gjermanie e Claudio Roya di Radio FM Comunicar di Colonia Caroya.

La cunvigne e tornarà a tacâ aes 5 daspomisdì, ore taliane, cui intervents di Elvio Ruffino, president de Alef Friûl Vignesie Julie; Luca Peresson, president dal Centri Friûl Lenghe 2000; Giorgio Santuz, president dal Ent Friûl tal mont; Renzo Matelig, diretôr de Union emigrants slovens dal Friûl Vignesie Julie. Daspò a fevelaran Mauro Sabbadini, ricercjadôr di Buenos Aires; Michele Bernardon, vice president de Comunitât montane dal Friûl ocidentâl; Sandri Carrozzo, president de Cooperative Serling; José Maria Casas Moral, president Casal Català di Córdoba. I lavôrs si sieraran aes 8 di sere, ore taliane, cul dibatit e lis conclusions di Marco Stolfo, diretôr dal Servizi identitâts linguistichis, culturâls e coregjonâi tal forest de Regjon Friûl Vignesie Julie.

Advertisements