Biel cjossolant. Une cjaminadute  sul Mont Cuarnan, juste parsore Glemone tra un golôs panorama e rosis di ogni sorte (ancje une stele alpine, mai vidude cussì a basse cuote). Parsore de mont une "gleseute-monument" di cui us trascrîf il scrit de tabele  picjade intôr dal mûr esterni.  Comun di Montenars – Parochie di Sante Eline – IL REDENTÔR  La Cristianitât e voleve celebrâ l’inizi dal XXn secul de Redenzion metint vincj crôs su li spicis plui altis d’Italie. Al capelan di Montenârs, pre Checo Badini, i vignî l’idee di meti il segnâl de Redenzion su la spice de mont dal Cuarnan, juste parsore il pais, a 1372 metros. La int e acetà dute contente cheste sfide e volè lâ ancjemò plui in là. Impen di une Crôs di fier, une Gleseute-Monument, cun tant di Crôs parsore. L’anime di dut al fo il capelan Badini, protagonistis principâls lis femninis, che par  mês e mês e jevarin ogni domenie a dôs di gnot par cjapâ une part di Messe e po rimpinâsi su la mont cu la lôr cjame. Dal Setembar dal 1901 il vescul bons. Checo Isule, natîf di Montenârs e vescul di Concuardie, al benedî la prime piere cun predicje par furlan. I lavôrs a lerin indenant par un an intîr, cun passe 7000 zornadis lavorativis. La gleseute-monument, simpri cu la presidence dal vescul Isule, e fo screade ai 22 di setembar dal 1902, a la presince di plui di 8000 di lôr, rivats dongje di dut il Friûl. La gleseute, a tronc di piramide cuadrangolâr, cun m. 5 di façade par 12 di altece, e tignive su la crôs di fier alte 5 metros. Tal 1964-65 si proviodè a une largje riparazion, par vie che un fulmin al veve puartâ prejudizi a dute la struture. In chê ocasion pre Checo Placerean, contornât dai fedêi, al disè la Messe par furlan, une autentiche primizie. Ai 6 di mai dal 1976 ancje la Gleseute dal Cuarnan e fo sdrumade dal taramot ch’al semenà di muart e di ruvinis chest cûr dal Friûl. Si decidè di tornâle a fâ su, cul jutôri e la solidarietât dai volontaris, par che chel simbul, ch’al veve viert il secul e compagnât i dîs di ligrîe e di passioon de int, al segnas l’inizi dal gnûf secul e milenari, come segnâl di sperance te fuarce misteriose dal amôr e dal dolôr. Dal 1982 il plevan pre Bruno Buzzulini, Lindo Isule e Gianalberto Seravalli si messedàrin par dâ dongje seont la leç "Il comitât di ricostruzion de Gleseute-Monument al Redentôr". Al comitât a derin la lôr adesion int di Montenârs, di Dartigne e di Glemone. L’impegn di ducj al fo a l’altece des dificoltâts di superâ: sistemazion des maseriis dal vieri monument e recupar des pieris di riproponi tal gnûf, studi gjeologjic dal teren e progjetazion da l’opare. La sô realizazion e impegnà plui di 500 volontaris, dutune cui mieçs tecnics e di traspuart metûts a disposizion dai Ents privâts e publics, dal Comant Alpins di Glemone e dal Comant Ale-Rigel di Cjasarse. La gleseute ricostruide e fo screade ai 22 di setembra dal 1985 cu la partecipazion dal arcivescul bons. A.Battisti, di un biel trop di autoritâts civîls e militârs e di passe 3000 fedêi, rivâts di tancj paîs vizins e anche lontans. E je tradizion di fâ la fieste dal Redentôr la tierce domenie di setembar, cu la celebrazion de Messe a cure dal Plevan di Montenârs.

Advertisements