Ocupazion e marilenghe


Cunvigne a Colorêt di chês che nus plasin

Cunvigne internazionâl a Colorêt di Montalban ai 26 di Jugn inmaneade de cooperative SERLING
di chês che mi plasin a mi: li che si fevele di lavôr e prodots in marilenghe.
Ati che fufignis lenghistichis 😉

«Efiets economics e ocupazionâi de tutele de lenghe furlane»

Aromai a son plui di dîs agns che si pues dî che e je tacade une politiche linguistiche pal furlan poiade des istituzions publichis: al è dal 1996, di cuant che la nestre regjon e à fate buine la leç 15/96. Po dopo e je rivade la leç 482/99 dal stât.
Fâ politiche linguistiche al vûl dî spindi, o miôr invistî, bêçs publics par vê un risultât: il risultât al à di jessi intal nestri câs il recupar de lenghe furlane, che si oten cun obietîfs tecnics. Tra chei plui imediâts si à di meti: fissazion de ortografie e de lenghe di riferiment, elaborazion di struments linguistics tant che dizionaris e coretôrs, publicazion di tescj di cualsisei sorte par furlan, elaborazion di struments didatics, insegnament tes scuelis, emission di programs radiofonics e televisîfs, ûs dal furlan te aministrazion publiche… in pocjis peraulis dut ce che al covente par fâ cressi il corpus e il status.

In chescj agns, intune maniere o intune altre, si è rivâts a diviers di chei obietîfs tecnics, ma i risultâts si otegnin cu lis personis e lis personis a puedin lavorâ ben se a son lis cundizions economichis e professionâls par stâ sigûrs e par cressi: in struc, i bêçs publics invistîts te lenghe furlane no àn dome di puartâ risultâts linguistics, ma ben a àn di vê ancje efiets economics e ocupazionâi: dome in cheste maniere si pues ancje garantî une cualitât dai risultâts e un sparagn des risorsis.

Daûr di chescj resonaments la cooperative SERLING, che e sta sù propit su la professionalitât dai operadôrs linguistics dal furlan e che par cumò e rive a tignî cuatri lavoradôrs dipendents stabii, e à organizât par cont de Regjon Friûl VJ une cunvigne, ai 26 di Jugn, li dal cjistiel di Colorêt di Montalban tacant des nûf e mize di matine. si presentarà i risultâts di une ricercje puartade indevant de SERLING su i efiets economics e ocupazionâi de tutele de lenghe furlane, a saran ospits che a presentaran la situazion ocupazionâl e economiche derivade de politiche linguistiche in Catalogne, in Gales, in Sardegne e tai Ladins des Dolomitis, a intervignaran alts rapresentants des istituzions e des realtâts plui interessadis par chest aspiet in Friûl.

Advertisements