La Propueste indecente


Dute la situazion de propueste di leç sul furlan tal articul di Christian Romanini su «Il Friuli». Nome Begot content, doi dai esperts che e vevin eleborât lis liniis vuide (Pup e De Clara) a cjapin lis distancis. Donato Toffoli: «Butât pal aiar il lavôr dai esperts». Mâl ancje i sindics furlans: la dignitât de marilenghe difindude di un triestin.


Ae fin dal an l’assessôr ae culture Antonaz al veve declarât “Il 2007 al sarà l’an dal furlan” e plui di cualchidun si jere iludût che cheste frase e ves un significât positîf. Ma cumò che la zonte Illy e à fat bon il dissen di leç “normis pe tutele, la valorizazion e la promozion de lenghe furlane”, a son vignudis fûr diviersis sorpresis, par chei tancj che si spietavin une leç miorative e riorganizative dal cuadri normatîf di tutele e promozion de lenghe furlane. E no son par nuie bielis sorpresis.

Par dî la veretât il percors inviât dal assessôr Antonaz al jere partît te maniere miôr, tacant prin di dut cuntune schierie di consultazions che e cjatavin fonde tal program eletorâl di Illy, li che si leieve za te introduzion la declarazion di volê meti in vore une valorizazion dal patrimoni linguistic regjonâl. Daûr di chestis premessis e jere stade nomenade ancje une comission autorevule di esperts, president il diessin e vicepresident de Societât Filologjiche Furlane Pier Carlo Begotti, che pe ocasion si jere dimetût de vuide de Agjenzie regjonâl pe lenghe furlane, par podê lavorâ ae gnove leç che e varès duncje cjapât il puest de leç regjonâl 15/96. Tal Avost dal 2006 cheste comission e veve tacât a lavorâ e pe fin dal stes an e veve presentât lis liniis vuide dal dissen di leç finâl, di finî dentri dai prins mês dal 2007. E cussì al è stât stant che, dopo che la zonte Illy e veve fatis buinis cence nissune modifiche lis liniis vuide te ultime sentade dal 2006, juste cualchi zornade indaûr al è stât fat bon il test definitîf di chest dissen di leç. Ma il dissen di leç al à lassât une vore di mâr tes bocjis dai furlaniscj de nestre regjon.

A tacâ dai stes components dal grup di esperts, che a critichin in maniere pesante il test aprovât, stant che al è une vore difarent di chel che al jere stât preparât di lôr. Di fat, se pal moment l’unic a laudâ il test aprovât al è propit il diessin Begotti cuntune letare publicade suntun cuotidian, Carli Pup e Licio De Clara a condanin pesantementri ce che al è stât fat dal esecutîf, stant che il test jessût de zonte al è stât modificât no dome te forme, ma adiriture te sostance stant che in cierts passaçs al rapresente un grant pas indaûr rispiet ae normative za in vore in dì di vuê (LR 15/96 e adiriture la Leç statâl 482/99).

“Il test che o vevin consegnât ae zonte Illy al è stât gambiât e modificât cussì tant che se al ves di passâ cussì come che al è, al sarès danôs pe lenghe furlane” a declarin cence miezis misuris Pup e De Clara. E fasint une analisi comparative ancje svelte dai doi tescj al è facil capî il parcè.

“Il test nestri al jere za un test di “mediazion” che al tignive cont de necessitât di une cierte gradualitât, ma che e cjalave a altris esemplis europeans, in particolâr al Gales (Welsh Language Board): li l’Ufici pe lenghe galese al è une struture nomenade de politiche, ma e je esterne e i tocje a cheste la planificazion de politiche linguistiche” nus sclarìs Carli Pup “La sielte e je motivade dal fat che in cheste maniere si evite che a ogni mudament dal asset politic, lis azions a pro de lenghe furlane, che no à “colôr”, a vedin garantide une continuitât, zontade al fat che dut câs cheste e rapresente un orghin tecnic e duncje espert in materie. E chest rûl noaltris lu vevin previodût pe Agjenzie regjonâl pe lenghe furlane, ma tal test fat bon de zonte (ma nus plasarès capî cui che al à fat lis modifichis…) l’Arlef al ven ridot a semplice comission consultive e lis prioritâts e i relatîfs contribûts a vignaran distribuîts “a ploie”: cheste no je politiche linguistiche pal ben de lenghe furlane, nol è un model galês, ma un model “suicide”… e di cheste maniere di fâ jo e De Clara o cjapìn lis distancis” al siere Carli Pup.

Ma tancj a son i problemis che si riscuintrin za tes primis riis dal test aprovât: no dome e ven indebolide la norme che e previôt la grafie uficiâl, ma adiriture si rive a meti in discussion il principi di teritorialitât declarât de leç 482/99 stant che al sarès previodût la pussibilitât che il president de zonte, cuntun decret, al modifichi la delimitazion teritoriâl che e je ae fonde de leç stesse.

“La zonte Illy e varès di sclarî parcè che dopo vê nomenât e paiât un grup di esperts, vêju fats lavorâ par mês e vê fat buinis lis liniis vuide, e à pensât di butâ par aiar il lôr lavôr, modificantlu in maniere drastiche, pandint une cognossince de materie mancul che scjarse e dal pont di viste juridic presentant un test che al à aspiets che a son plui che balarins” al declare Donato Toffoli, za component dal Osservatori pe lenghe furlane e cumò membri dal Comitât tecnic sientific de Agjenzie pe lenghe furlane “Cence fevelâ de filosofie complessive che e ven fûr dal test: l’ûs de lenghe furlane “al è permetût” tai ents locâi, nol è un dirit! O ben perlis come il fat che tes superiôrs, che no sedin istitûts linguistics e pedagogjics, si pues doprâ il furlan come lenghe veicolâr, ma dome se ducj te classe, dal prin al ultin, a son dacuardi. Ma si podarès continuâ a di lunc”.

E intant il test al è passât al Consei des autonomiis, li che intun prin incuintri, lunis ai 4 di Mai al à riscjât di jessi boçât: dome l’intervent dal president de Provincie di Udin Marzio Strassoldo al à evitât che al saltàs dut, ancje grazie ae mediazion dal vicepresident de Provincie di Triest Walter Godina. Ma il president Strassoldo al met une condizion fuarte pe aprovazion dal test “O pensi che al è impuartant aprovâ une gnove leç su la lenghe furlane dome se cheste e garantìs un miorament rispiet ae normative za in vore” al à declarât ae fin de prime riunion, anunciant ancje un document cuntune schirie di emendaments par tornâ a dâ dignitât al test normatîf prime de aprovazion definitive.

Vie pe seconde riunion vude miercus ai 6 di Mai il test dal dissen al è stât aprovât ancje se “Chest al è dome il prin pas di un percors”, come che al declare Giuseppe Napoli sindic di Precenins, tra i pôcs a vê pretindût un impegn plui fuart in difese de 482/99.

Il consei des autonomiis si è duncje sierât cul impegn di bande dal Assessôr Antonaz a miorâ tes prossimis setemanis la normative. Ciert al è che l’ategjament vût dai sindics dentri di chescj 3 dîs al à di fâ rifleti une vore: se e je vere che l’esecutîf regjonâl al à grandis responsabilitâts par chest document, ancje i prins citadins prin o dopo a varan di jessi clamâts a rindi cont dal fat di vê frontade la cuestion in maniere avonde lizere e disunide: emblematichis a son stadis lis peraulis di Walter Godina dopo de prime riunion di lunis “Al è avonde inusuâl che o sedi stât jo, un triestin, a difindi la dignitât dal furlan”.

Advertisements