Il Zanussi smenteât


In pôcs di lôr a an memoreât Paolo Zanussi, chei dal Premio Terzani sì

Dai 10 ai 13 di mai al tache «Vicino/lontano Identità e differenze al tempo dei conflitti Premio Terzani Terza edizione», a Udin.

Un premi che achi sul blog al è stât definît superficialmentri “estranei” al Friûl, ma no je propite cussì. Difat a son praticamentri i unics che si son visâts di Paolo Zanussi, il grant grafic, inlustradôr e inteletuâl furlan che – tra lis altris robis – al inlustrave lis oparis di Riedo Puppo. Dismenteât di ducj (ancje dai gjiornâi li che al publicave), al à vût une mostre l’an passât.
Pe «Patrie dal Friûl» di març o ai intervistade la vedue, scuvierzint cualchi robe interessant…

Par lei l’interviste

Zanussi artist e inteletuâl furlanist

Interviste a Maria Faleschini, vedue dal artist Paolo Zanussi che al inlustrave i libris e lis vignetis di Riedo Pup

Siore Faleschini, il so omp al jere un preseât grafic e ilustradôr, cemût vevial inviât la sô cariere?
Al si ere laureât in jurisprudence ma nol à mai praticât. Al à vût l’ocasion lâ a vore a Milan li de Kodak e dopo intune grande agenzie publicitarie. Podopo al si è metût bessôl tant che diretôr artistic free lance. Chê di illustradôr e artist e jere la sô passion.

Quindi si sêso cognossûts a Milan?
No. Si sin cognossûts a Paris, dulà che lui al lave par seguî il lavôr te sede francês de agenzie.

Viveviso a Milan?
No, jo o stavi a Vignesie li che o insegnavi, e lui a Milan. Si viodevin ogni fin setemane a Udin. Podopo o viazavit tant, apene pussibil. Al gno omp i plaseve un grum viodi i puescj e la int. E ju piturave: al si puartave simpri daûr il material par disegnâ.

Ma un diretôr artistic di livel nazionâl parcè disegnavial tant par robis furlanis?
Al jere leadissim al Friûl e amî di int come Lelo Cjanton, Riedo Pup – apont -, Tarcisio Petracco, don Duilio Corniali.

Erial nome leât al Friûl o ancje «furlanist»?
Al jere ancje furlanist: al tignive aes bartais pe autonomie, pe Universitàt, ae difese de lenghe. Ancje se al jere critic…

In ce sens?
Al cjatave che tantis voltis al si lave masse viars il ricuart, il folcloristic: lui al crodeve intune une lenghe che servìs par dut e che fos moderne.

Une vision une vore indevant par l’epoche…
Sì: cumò chescj discors a son plui acuisîts che in chê volte.

Jê ogni an a ricuarde il so omp fasint un calendari.
Cuntun trop di amîs si sielç un tema par lis 13 inlustrazions dal calendari. Robe no facil parceche la sô produzion e je grandonone. Al disegnave ogni dì, in viaç inmò di plui. Il stampadôr al si smaravee ogni volte di ce tant material che o ai. O fâs fâ 500 copiis che a van a amîs e a cui che m’es domande.

Ce isal stât fat par memoreâlu e ce isal in progjiet?
I organizadôrs dal premi Terzani di Udin sie tal 2006 che l’an prime a an volût dai disens par lôr mostris. Di pôc cualchidun al mi à domandât par esponi a Triest o a Vignesie ma no sai ce fâ: e je une grande fadie seguî une mostre.

Masse pôc pal valôr de opare dal so omp, come par Pup…
Fûr di une mostre fate in place Sant Jacum a Udin – e jere tante int – o ai sintût un zovin a dî: «Ma dulà lu ano platât chest, fin cumò?» Une grande sodisfazion. Il fat al è che il gno omp al jere une vore schivo e podopo volontariamentri si è gjavât fûr dai zîrs artistics de regjion. Cussì la memorie e je afidade a amîs e a chei che seguivin di dongjie la sô opare.

© «La Patrie dal Friûl» par abonâsi info@lapatriedalfriul.org (25 euro l’an o 30 cuntun libri in regâl Cont postâl n. 12052338 intestât a “la Patrie dal Friûl” Glemone)

Advertisements