Il Diari nr. 5, avrîl 2007

Il gnûf numar dal mensîl «free press» in marilenghe

Gratis ator pai bars e in edicule a 20 centesims, discjiamabil on line

li di ildiari.eu.
Cun chest numar e je tacade la mê colaborazion cul mensîl cuntune rubriche a caratar tecnologjic:
«CABLÂT E CONTENT»
ve cà l’articul

DUT UN ALTRI MONT

I media nus descrivin il rapuart jenfri zovin e internet soredut traviers alarms. Ma se si scoltin i zovins la musiche e je divierse e si marche il ritart dai grancj.

Intant che i media nazionâi a son impegnâts in crosadis cuintri telefonins e internet i zovins nus fasin mandi e si proietin viers il futûr, come forsit al è just che al sedi.

Chest al è il risultât di une ricercje fate de Universitât Catoliche di Milan sul ûs dal web di bande di adolescente e pre adolescents, massime tes scuelis: «i ragazzi del web» il so titul. Propit pal cont di chest cantin i adults a si dimostrin indaûr rispiet ai timps, dimostrant di no tirâ dongje lis grandis oportunitâts e la sfide che nus provochin i gnûf media.
I risultâts a pandin un zovin une vore consapevul dai siei consums, ancjemò leât a fuart ae culture dal libri e de television che al navighe no par divertiment ma par rispuindi a necessitâts concretis.

Il scandai al disvele une scuele e un mont dai grancj che no rispuindin a cheste esigjence. «A scuele no nus fasin doprâ internet» al conte un frut di dosis agns. A scuele l’ûs di chest imprest nol è ben viodût par timôr di virus o di discjamâ programs no proviodûts. Il 70% dai fruts al declare che nol dopre internet a scuele.

«A cjase no si fevele di internet» al dîs un altri. Passe il 50% dai fantats al dîs che lis informazions su la rêt no i rive dai gjenitôrs ma di amîs o di fradis e sûrs e l’80% al fevele des scuviertis che al fâs su la rêt nome cun amîs.

La rêt e ven doprade par discjamâ musiche, doprâ i motôrs di ricercje par gjavâ fûr contignûts varis e par messaçs. Internet difat al à creât dut un mont di relazions che a nassin sì in maniere virtuâl ma che a florissin tal mont reâl. «Internet al è deventât un mût di comunicâ jenfri une persone e che altre par dut il mont» al dîs un frut di Milan. Difat i zovins a an declarât che di cuant che doprin internet a an aumentât il timp dedeât a viodi i amîs. Un mont che cuindi nome pai grancj e, magari cussì no, pe scuele al reste virtuâl. Insome… cablâts e contents.

Achi il sît da la ricerche.

Advertisements