Fieste de Patrie
Riflessions autonomistis tal inovâl dai 3 di Avrîl
Sul sît dai Ladins dal Friûl o ai cjatât chest articul di Renzo Balzan:

Il 3 di avrîl pe nestre tiere e je une date cetant impuartant. Zornade di fieste grande, ma ancje ocasion par butâ jù cualchi riflession tal inovâl dai 930 agns che la nestre “Patrie” e à inviât il so salustri di indipendence. Par esempli nus semee palês, inte situazion dal dì di vuê, che la esigjence de regjon unitarie Friûl-Vignesie Julie no je compatibil cu la sorevivence dal Friûl. Cui che al sta de bande di cheste unitât regjonâl pustice al scugne vê cussience che al seonde la eutanasie di un Paîs che al à almancul mil agns di storie, che al è compliç de distruzion di une lenghe, di une concezion di vite, di un sisteme soci-culturâl origjinâl.

Al esist un Friûl storic, etnic, linguistic e economic, che vuê al è condanât a jessi nome une sclete espression gjeografiche. No esist nissune istituzion politiche-aministrative che lu cjapi dentri intune cente esclusive, che lu tegnin adun e che lu definissi. A esistin dome trê realtâts provinciâls (Pordenon, Gurize e Udin) cun efetivis diferencis. Ma al esist soredut il clâr disen dal podê politic regjonâl e des centrâls dai partîts (talians) a saborâ lis diferencis. Vadè che si cîr di fâ passâ l’infuarciment de regjon “unitarie” Friûl-Vignesie Julie a traviers la disgregazion de sô component furlane.

Daûr di cheste premesse al è evident che pal popul furlan dome une Regjon Friûl e po jessi une reâl sfere di democrazie e di partecipazion par vie che une Regjon e po esisti dome se esist une comunitât di fat, sostanziâl. Al è par chestis resons che la Regjon Friûl e va perseguide cun indurance, ancje inte sperance che e judi il popul furlan a conservâ e a infuartî i valôrs de sô culture “la cjase, la famee, il lavôr, la onestât, la dissipline, il rigôr, la solidarietât, la stabilitât, il sens dal dovê coletîf”. Dal rest il Friûl al à plen dirit a une sô autonomie politiche-aministrative, ancje pal fat che le à za vude (dal 1077 al 1420) e le à metude in vore in maniere cetant positive.

    Si dîs (massime a Triest) che al è sbaliât disfâ la regjon che o vin vuê parcè che e je za masse piçule. Nuie di plui fals. Intune economie moderne nol à sens fevelâ di “complementarietât” dai sistemis economics se si fâs riferiment a spazis strets, e mancul inmò e je sostignibil la tesi di une “dimension otimâl”  de   regjon,  viodût  che  produtivitât, benstâ e fuarce economiche di une aree no àn nuie a ce fâ cu lis sôs dimensions teritoriâls e demografichis. Inte stesse maniere dome se si fâs cont su la supueste che la economie di cheste aree e vebi di continuâ a jessi une economie semi-publiche, assistude, dipendent, e po jessi sostignude la tesi che une division fra Friûl e Triest e puartarès a une diminuzion di fuarce contratuâl tai rivuarts dal Stât.

Sotliniade la naturâl vocazion internazionâl dal Friûl, indipendetementri di Triest, e lis reson dal dirit a une sô specialitât determinade de sô posizion gjeografiche e de sô composizion etniche, il refût che a chestis richiestis al è simpri rivât de bande di Rome e je ancje colpe di cierts deputâts e di cierts senatôrs chê, votantju, o vin mandât venti jù a rapresentânus, e che invezit di fâ valê lis nestris resons a àn vût miei compuartâsi di sotans e di proconsui.

Dut câs, viodût che in timps curts l’obietîf di rivâ a otignî la “Regjon Autonome Friûl” al è dificil di rivâ a realizâ, bisugne par fuarce scomençâ cul passâ a traviers la creazion di une istituzion che e dedi un minim di autonomie aes trê provinciis furlanis metudis adun, o sei ae Assemblee des provinciis dal Friûl, proponude dal Comitât pal rilanç e la autonomie, di D’Aronco, Baracêt e Pascolat. Pi di mancul o tornìn a bati sul cantin che l’obietîf minim de Assemblee des trê provinciis furlanis al po sei acetât dome in spiete di une vere soluzion de “cuestion furlane”. Vâl a dî la istituzion di une regjon Friûl ”gnove”, ancje tal mût di tratâ al so interni lis diferencis storichis, sociâls, culturâls, linguistichis, e economichis, che a metin adun la sô essence. Une regjon dulà che lis diviersis realtâts teritoriâls, o sei Friûl Gurizan, Basse, Friûl di Mieç, Alte, Cjargne e Friûl di là de aghe a vebin la stesse dignitât e atenzion.

E nol po nancje sei dismenteât un pont di riferiment fondamentâl par une Regjon Friûl, come che al scugne jessi chel di une rigorose politiche linguistiche, cu la metude in vore, ad in plen, de leç di tutele 482/99, soredut par chel che al inten la scuele, i mieç di comunicazion (massmedia), la toponomastiche e la publiche aministrazion, in colaborazion e cul sostegn sientific de “Universitât dal Friûl”, sevi sul cont de comunitât furlane, sevi par chês altris comunitâts di minorance presints chenti.

In fin, juste cun riferiment al dibatiment inviât di resint sul con dal insegnament de lenghe furlane a scuele, al merte memoreât che l’insegnament de nestre lenghe, cussì come chel di altris lenghis minoritariis, al è proviodût par leç. Al è partant dibant fevelâ di obleazion. Se mai si à di cirî di cjatâ il mût e la maniere plui adate par meti in vore la leç. Bisugne ven a stâi stabilî cualis materiis insegnâ par furlan e par cetantis oris. La za vude iniment leç 482/99 sun chest cont e fevele clâr. Vadè che la delimitazion teritoriâl dulà che si met in vore lis disposizions di tutele des minorancis e je adotade dal Consei provinciâl. Il criteri stabilît de leç al è aduncje teritoriâl. E inte cente di chescj Comuns la norme e stabilìs che in dutis lis scuelutis la educazion linguistiche e proviodi, dongje dal ûs de lenghe taliane, ancje l’ûs de lenghe de minorance pal davuelziment de ativitât educative. Chest al vûl dî che lis scuelutis a scugnin garantî l’insegnament dal furlan. Intes scuelis elementârs e secondariis di prin grât al è po proviodût ancje l’ûs dal furlan come istrument di insegnament. Al è evident che interpretazions diviersis, o sei al difûr de leç, no puedin jessi plui acetadis.

Advertisements