»»» ILfurlanist 482
Smail! Rît, sù po!
Gnove campagne dal Cirf
Al rive il “smile” made in Friuli che, a scomençâ dal mês che al ven, lu viodarìn su lis vetrinis dai ambients o tacât su machinis, su russacs, su cascs di moto e al darà une cimiade ae int declarant, fasint di voli, “Jo o feveli furlan”.
Cun cheste imagjine, stampade intun adesîf colorât, cuntune musute che cun simpatie e fâs intindi di fevelâ par furlan, e che e segnale la disponibilitât a fevelâ daurman in marilenghe, il Centri Interdipartimentâl su la culture e la lenghe dal Friûl (Cirf) de Universitât dal Friûl al intint promovi l’ûs de lenghe furlane tai ambients, tai esercizis comerciâi e fra i zovins.
L’adesîf al è realizât in dôs dimensions, une pes vetrinis dai ambients e une plui piçule par un ûs plui informâl di aplicâ su diviers imprescj e materiâi. Il gadget al sarà dât fûr martars ai 3 di Avrîl in ocasion de ricorence de Fieste de Patrie dal Friûl, aes 14.30 te sale Florio di Palaç Florio, in vie Palladio 8 a Udin. Daspò, i “smile” a podaran jessi mandâts o ritirâts a gratis contatant il Cirf in vie T. Petracco 6 a Udin telefon 0432 556480, e-mail cirf@uniud.it.
«Il “smile” adesîf – e spieghe la coordenadore dal progjet, Priscilla De Agostini, dal Cirf – al permet di ricognossisi daurman come “fevelants” e al fâs nassi un clime favorevul ae lenghe dal ambient, in mût di ingolosî e di stimolâ lis personis a sielzi come prin contat comunicatîf la lenghe mari ancje dentri dai ambients e dai esercizis publics».
«Cun cheste gnove azion di promozion de lenghe furlane – e zonte la diretore dal Cirf, Piera Rizzolatti -, inmaneade in gracie dai fonts de leç 492/99 su la tutele des minorancis linguistichis storichis, l’Ateneu furlan, e massime il Cirf, a confermin il lôr impegn a pro de cressite e dal disvilup de lenghe e de culture dal Friûl».

Advertisements