IL WEEKEND NO SI LAVORE…
ma si sta un tic avilîts par vie de muart di un grant..


Corot pal Cava

Nus à lassât Osvaldo Cavandoli, artist e omp solâr
Îr a buinore a Milan al è muart Osvaldo Cavandoli, il creadôr de «la Linea» che al è stât gno profesôr di animazion e mi à procurât il prin lavôr intun studi di Modena.
O ai scrit parsore nome «un tic» avilîts no a câs, pur cognossintlu ben. Prin parceche sigûr a son plui avilîts i parincj e al è une forme di rispiet no esagjerâ te retoriche, e podopo parceche il Cava al è un che al si è gjioldût la vite adimplen. Par dî une, cuantche o soi stât so arlêf tai prins agns 90 e lui a ‘nd veve già 65-70 al rivave a scuele cun cjamese viarte e fularin, ocjiai di soreli e bronzadure.
Une persone solâr, disponibil e vierte a ducj. E ducj a podevin lâ a cjatâlu tal so studi di via Prina a Milan e ju acoglieve simpri cun aligrie, barzaletis e scherzos.

No la fâs tant plui lungje, cun vualtris oltre a chestis peraulis o ai voie di ricuardâlu cu la sô grande opare, ve cà un video fat pai 20 agns de «Linea» lì che lu si viôt interagî cu la sô creadure intune sorte di testament anticipât.

Advertisements